《耿耿于怀》《念念不忘》《罗生门》麦浚龙用了10年唱出爱情三部曲

丶萧易 2021-09-13 15:53:08

点击上方“中山微西区”,了解更多西区资讯


麦浚龙(Juno)2004年推出的歌曲《耿耿于怀》,唱尽“毒男”心声,今年初推出续集《念念不忘》,直到近日与谢安琪合唱终结篇的《罗生门》,这3首歌构成爱情故事三部曲,热爆全城,好多网民在网上疯狂洗版,更表示到眼湿湿。




iTunes香港十大排行榜 Juno占九首歌
日前麦浚龙(Juno)同谢安琪(Kay)合唱嘅新歌《罗生门》喺YouTube首播,引起全城热爆,YouTube点击好似坐火箭咁飙升至53万,相关讨论喺facebook狂洗版,全城吹响一遍“罗生门”热。

但最令人意想唔到嘅系,Juno三部曲除咗带挈埋十一年前旧歌《耿耿于怀》再度翻叮外,连同Juno其余旧歌都一并炒热。最新嘅iTunes歌曲下载排行榜,头十位歌曲居然有九首系Juno作品,分别系《罗生门》、《念念不忘》、《耿耿于怀》、《瑕疵》、《没有人》、《有人》、《蒙》、《弱水三千》同埋另一version嘅《耿耿于怀》,而其实Eason新歌《无条件》已经好劲,可以抵抗到“Juno狂风”力保第七位。


部分歌曲试听:



p.s.我们也想找到更多麦浚龙的歌曲分享给大家试听,可惜那鸡肋的QQ音乐无法提供更多歌曲。


这三首歌都系由黄伟文(Wyman)填词,Wyman今日接受电话访问,讲番点解会有呢个concept。

Wyman表示:“件事系因为11年前写咗《耿耿于怀》,12年我嘅作品展撞番Juno,当时完全唔知道拣乜嘢歌畀佢唱,我哋合作嘅歌都几多,《有人》、《没有人》、《濛》呢几首都觉得可以唱,但当时隔离左右嘅人,都话要拣《耿耿于怀》,因为好多人钟意《耿耿于怀》,当时我系有啲惊奇,因为呢首歌喺11年前,打榜成绩唔系太出众,电台、媒体高层唔觉得呢首歌特别好,原来群众心目中好受欢迎。”

当晚作品展Juno唱咗《耿耿于怀》,效果好好,歌迷反应都好热烈,Wyman就话:“我有个狂想同Juno讲,啱啱事隔十年,我哋好耐冇合作,不如揾埋伍乐城做番只《耿耿于怀》续集,讲番十年后呢个男仔点样,你知Juno循例冇乜反应,之后过咗两年,佢(Juno)同我讲不如做,14年做呢首歌(《念念不忘》),摆咗一阵,到15年先派,佢可能觉得等重要时机派台,所以喺15年呢只歌面世。”

Wyman续说:“之后Juno又畀电话我:不如呢首歌、呢个故仔、呢个男主角,我哋舖排成一张6只歌嘅EP,将歌曲里面每个人物都活化、立体化,佢第一样谂到呢首歌里面嘅‘你’,o依家分开后重新拍拖嘅‘她’,揾两个女歌手饰演真人版,所以有《念念不忘》,好多人钟意,我哋开始苦恼,故仔应该点舖排,其实仲有莫文蔚同Juno合唱《瑕疵》,莫文蔚饰演女朋友,之后到谢安琪呢首(《罗生门》),我提议不如反转嚟写,女仔眼中世界其实同男主角唔一样。”



《耿耿于怀》《念念不忘》《罗生门》三部曲




Juno新专辑 分正传外传
Wyman表示构思呢几部曲系见步行步:“唔系好有组织同计划,因为做一首歌冇谂到有第二首,第二首时未知第三首系点,呢只碟有6首歌,《耿耿于怀》(不在新碟内)、《念念不忘》、《罗生门》系正传,其他几首系外传,包括莫文蔚合唱《瑕疵》、周国贤合唱《雷克雅未克》,Juno独唱《睡前服》、《单鱼座》,呢6首歌加埋其实系一部微电影,不过冇拍到出嚟,我觉得好嘥。”

讲到周国贤合唱嘅《雷克雅未克》呢首歌,Wyman表示系另一个“罗生门”,佢话:“因为喺Juno眼中系呢个故仔其中一个人物,仲系压轴出现㖭,但喺我眼中系另一个故仔人物,不过两条线喺呢张唱片有交错,正如《阿飞正传》嘅梁朝伟。”

Wyman又谓《睡前服》系讲安眠药:“男仔喺呢十年同新女友生活,但每晚都挂住旧女友瞓唔着,《单鱼座》讲呢个男仔性格出自双鱼座嘅相反,所以念念不忘,Juno真系双鱼座。”



歌词“残忍” 摧毁十年梦 Wyman:欢迎到现实世界
Wyman话:“好耐冇试过有广东歌有现状性,歌曲出街到o依家48小时都冇,好多人讨论呢件事,个个话㖊晚大家喺黄雨听住首歌喊咗成晚,好似同个天斗病,我都喊咗成晚,原来个个都关心广东歌,呢样最感动,Juno今朝send讯息畀我,佢话一夜之间iTunes广东歌嘅销售,头四位系呢4首广东歌,自己都毛管戙。”

而Juno同Kay合唱嘅《罗生门》,只系推出短短两日,暂时喺YouTube点击已破24万,甚受欢迎,有网民指Wyman歌词相当“残忍”,看看呢几句:“很感激 喜欢我十年仍不休 近日旧同学说我已 耿耿于你心六百周 很可惜 这一世未能长厮守 但事实如若告诉你或更内疚 我爱过哈囉吉蒂吗似乎没有”

Wyman亦话:“十万个人问我点解咁残忍,一手摧毁佢哋十年嚟嘅梦,我话,欢迎嚟到现实世界,依家你闹我狠,但三五七年后,你醒咗会多谢我。”



《瑕疵》MV


继《耿耿于怀》、《念念不忘》同《罗生门》三部曲之后,麦浚龙(Juno)将会推出外传《雷克雅未克》,呢首歌系佢同周国贤(Endy)合唱,并由Endy作曲、黄伟文填词,Endy今日接受电话访问,佢话:“故事讲两个情侣分手十年,当年佢哋约定十年后去冰岛浪漫一番,奈何段情冇咗,但男仔好坚持要自己去。”


问到佢喺首歌担当边个角色?Endy笑话:“我都有啲迷糊,我可能情敌,其实我只系唱最尾几句,感觉似《阿飞正传》嘅梁朝伟,最后出嚟梳个头,Juno叫我写呢首歌嘅时候,佢话唔要一首好standard嘅歌,叫我畀一首好癫嘅歌佢,佢话要好浪漫好多旋律,之后我send咗demo畀佢,但佢都嫌唔够劲,佢话要再癫啲,我就大解放将毕生功力攞入歌里面,出嚟超难唱,好似新浪漫古典音乐,好高音好长冇重复,好似歌剧嘅女高音,所以有冰岛感觉。唔可以形容系流行曲,根本系艺术品,我写咗两、三个月,当时多伦多落紧雪,o依家写唔番意境。”

Endy话收到歌词后,自己忍唔住录咗独唱版本:“好在自己试验咗先,真系好难唱,交番畀麦生唱,我哋成日斗高音,我唔够佢高音,嗌爆喉咙都唔够佢高音,其实佢系女高音。”之前佢试唱一次,觉得有啲危险,笑言要降key。Endy又谓首歌七分几钟,Juno唱十分之九,佢唱十分一,因为似《阿飞正传》梁朝伟出场感觉。

咁有冇听晒三部曲?佢话:“听咗,好劲,佢钟意打破传统,唔守旧肯试新嘢,够大胆,野心大。”

Endy话同Juno合作多次,两人几有默契:“我哋频率几似,都系唔多出声嘅内敛仔,第一次认识佢喺颁奖礼记者会,个个涌晒前面影相,我哋就匿喺后面,呢条仔咁得意,所以同佢熟咗,开始音乐合作,今次第三次合作。”

《雷克雅未克》部份歌词率先曝光:

请你兑现约定 飞到伴我看星

往昔福岛名胜 破损中显神圣

谁人能为 昨日情

过十年后 再度远征

时间废墟里

寻那 不经污染 相恋的铁証


Juno同Wyman合力摧毁“十年男仔”一角
现年31岁的主唱Juno接受访问时表示:“其实入行第十年,拍咗《僵尸》呢部电影,拍完电影后,咁啱我同阿Y(Wyman)谂到‘念念不忘’呢个Term,个一刻我觉得个时间好似好吻合,如果冇一个至少十年,点称得上念念不忘呢?”



Juno又谓:“呢样嘢吸引我开始咗呢只碟企划,而佢好玩地方,今次好系角色扮演,其实工作同导演好相近,我哋去发展耿耿于怀嘅呢个男仔,当佢系一部电影咁,冇可能得一个角色,所以其实无论幕后班底,甚至乎幕前,包括Karen(莫文蔚)﹑Kay(谢安琪)或者周国贤,甚至乎我自己,其实都系喺耿耿于怀呢个世界,去探索佢身边所有事情,我自己好开心及感激大家好喜欢呢个故事。”

至于同人妻Kay合唱《罗生门》,Juno就话系呢个故事一个里程碑,佢话:“我同阿Y觉得我哋好想将‘十年嘅男仔’呢个角色,将佢完全摧毁,将我哋一手建立嘅,去完全摧毁佢,其实有呢个能力摧毁呢个角色,我相信世界上得两个人,一个系我﹑一个系黄伟文,所以我哋由第一日去倾呢个故事,我好想写一个‘罗生门’咁样嘅歌,我好想听多啲呢个女仔睇法,我觉得Kay唱得好好,Karen喺《瑕疵》都系,佢哋演活咗我幻想呢个世界嘅一种角色,虽然制作过程唔算好长,冇拍电影咁长,但系艰辛,因为你谂到呢个故事,我同阿Y去倾,好似捉棋咁,将每一个幕前幕后团队去做埋一齐,我系好多谢佢哋信任,当然佢哋每一个都系我心目中男女主角,因为佢哋担当紧好重要角色。”

Juno表示:“我同阿Y(Wyman)创作过程,我哋好想好现实地讲一段或几段关系,而一个连贯性好强﹑故事性好强嘅方向,呢样嘢好吸引到我,结果就出现《耿耿于怀》,直至十年后嘅《念念不忘》﹑到《瑕疵》﹑到今日《罗生门》,大家有种感情想追看角色发展,但我哋从来唔想去写…即系呢个唔系童话故事,但当中存在咗好多人生小道理,亦都有佢嘅甜蜜时候,对我呢讲呢件事几浪漫,但一种遗憾美嘅浪漫,所以我其实最要多谢阿Y,我仲好记得有次通电话,我哋好似好雀跃嘅小朋友,对呢个故事发展好有兴趣,好多谢大家钟意呢个故事。”

Juno续说:“我谂去做呢只碟,喺我心目中有个大前提,呢个大前提系其实有边个未曾念念不忘过?咁呢个就系‘人’囉,我觉得呢个系人可爱﹑有趣﹑但系又好复杂嘅地方。”

Juno又话做呢只碟同去拍一部电影都好相近:“我哋由第一日开始已构思故事架构及里面人物,佢哋对?段感情睇法,可能大家睇法都唔一样,我觉得呢样嘢好有趣,我去揾Karen(莫文蔚)饰演呢个现任女朋友角色,从中感受到Karen有一种淡然,呢个系我最主要,系我第一时间谂起佢嘅原因,而Kay(谢安琪)呢,我透过佢声音,感受到?种不舍,我亦第一时间谂起佢,去饰演十年前伴侣角色,佢两位都可演活呢个角色,系团队上功劳,亦好多谢佢哋信任。”

Juno表示今张专辑跟以往做歌唔同,佢话:“我想喺‘有嘅空间’唔系只听到我一个人角度,而系听到第二啲角色嘅角度,所以《罗生门》系一首合唱歌,但佢哋旋律上分配,唱嘅比率,同以往听嘅合唱歌有一个分别,尤其系《罗生门》,我想听多啲呢个女仔角度,我嘅睇法已透过《念念不忘》已知道。”

佢又话:“我谂喺《罗生门》里面,其实当我哋制作呢首歌,佢有趣地方在于呢两个角色,唔系因为佢哋唔爱大家而分开,佢哋分开系因为佢哋从来唔了解大家,呢样嘢系比较复杂,唔系话大家冇咗感情…我哋分开咗,但系有好多嘢我哋冇解释到,原来真相大家唔系唔爱大家,大家都爱,真相系大家从来唔了解大家。”

Juno表示虽然呢个系虚构故事,但当中每首歌嘅情感,系可以套用喺现实里面:“相信无论男或女都好,总会有呢啲情况出现,所以变相可能会贴近到听众佢哋喜欢呢一系列的歌,其实每个人都经历过及经历紧呢啲情况。”

Juno所属唱片公司Silly Thing发言人表示,《罗生门》的MV将会在下周于网上发布,至于第四部曲《雷克雅未克》亦会于不久将来面世。


Kay叹《罗生门》:呢段感情令人好心酸
麦浚龙(Juno)嘅《耿耿于怀》、《念念不忘》同《罗生门》三部曲热爆全城,佢同谢安琪(Kay)合唱嘅《罗生门》更被网民捧为神曲,截至今午两点几,《罗》喺YouTube点击破66万,相当厉害!

《罗生门》女主角谢安琪(Kay)接受电话访问,原来佢同呢只歌好有缘份:“好开心!呢只歌一出好好成绩,几开心有人发现到一啲细微特点,例如狄更斯同我嘅关系,之前我有只歌《最好的时刻》都系出自狄更斯,另外我有首歌《临崖勒马》系讲福岛地震,之前我又喺冰岛影过封面《慢活》,初初做新人时,啲人就问我钟唔钟意Hello Kitty猫?我真系唔系特别钟意,呢啲细微嘢咁桥同故事主人翁一样,我都同Juno讲番,好似冥冥中嘅缘份。”



《罗生门》歌曲试听


Juno点解揾你合唱?Kay话:“佢话几重视呢个角色,因为佢做莫文蔚?只歌(瑕疵)先,佢想揾完全唔同感觉、唔同声线、唔同味道、有自己特出个性嘅人,佢好快谂到我,我哋唔熟㗎,有日佢无端端同我讲话合作囉,我话:‘吓,真系㗎?’因为我睇咗佢导演两部戏,我都好有兴趣同佢合作,所以佢邀请我就好开心。”

呢首歌系咪好难唱?Kay话:“唱就唔难,最难系感情,大家猜度女主角究竟点谂,有啲觉得佢好绝情,有啲觉佢摧毁呢个男子,其实我觉得唔系,呢个女主角都钟意男主角,不过真系讲紧十年前大家系同学,毕竟好年青时喺埋一齐,分开咗各走各路,女仔好钟意佢,不过放低咗好耐,估唔到十年后旧同学聚会,先知男仔仲系对佢耿耿于怀同念念不忘,真系唔知道自己对男仔影响咁大。”

Kay续说:“其实佢都好多谢呢个男仔,一直记得约定十年后某地方相聚,男仔印象中系去好梦幻好靓嘅冰岛,女仔印象中大家系相约喺福岛,十年前未有福岛地震,福岛都曾经系好靓地方,原来大家唔止睇法唔同、感受唔同,连当年相约嘅地方都系误会,呢段感情都几惨,我觉得几冤㗎。”(歌词:别疯狂 下个一月 愿如期团聚于 冰岛某地方(让前尘沉淀于 福岛某地方))

Kay觉得女主角虽然表现冷静,但都有将呢段感情摆喺心:“我特登唔唱得咁绝,好想开解番前度,同佢讲曾经好动人时光,记得就得,唔使再缅怀令自己辛苦,劝佢睇开同放开,呢个女仔可能有自己另一半,有自己好好嘅生活,所以先咁成熟,对呢段感情开得放,呢个男仔其实都有另一半,但十年都冇接触过嘅人,反而晚晚睇女仔facebook,攞手机睇佢有冇online,令人好心酸!”

“很感激 喜欢我十年仍不休 近日旧同学说我已 耿耿于你心六百周 很可惜 这一世未能长厮守 但事实如若告诉你或更内疚 我爱过哈囉吉蒂吗似乎没有”

呢首合唱歌讲到个女仔摧毁咗男仔嘅十年情,不过现实生活中,Kay表示会拣呢个男仔:“其实我好钟意呢个男仔,好钟意咁长情嘅人,因为我都好长情,我都唔舍得,摆明揭穿底蕴令男仔彻底摧毁,以为佢钟意睇漫画钟意Hello Kitty,其实根本唔系,呢个男仔唔系咁深入了解佢咁沉迷嘅初恋,唔怪得女仔会同佢分手,佢从来冇真正了解女仔,真系好唏嘘,所以我唔舍得语气唱得咁绝,我唱嘅时候都好留手,好锡住呢个前度咁唱。我又少唱情歌,入面流露嘅感情系我好少有嘅感情。”

Kay表示:“之前两只歌,十年前嘅佢好青涩,十年后《念念不忘》好感动到我,听出佢明显成熟咗,所以如果我系?个女仔,好想同佢一齐,咁长情嘅人呢个世代好少有,好多人分手后,将对方嘅衰放大,唔记得对方嘅好,佢就好钟意呢个女仔,觉得女仔天上有地下无,呢个男仔几难得呢,我都同Juno讲,如果唔系你设计男女性格咁唔夹,我直头会求佢写番埋男女主角一齐,我个人好有爱,宁愿写好结局畀佢哋。”

呢首歌勾起好多人嘅耿耿于怀同念念不忘,Kay话:“好多人心里面总有啲人放唔低,Juno角色系饰演咗一个绝--好极端放唔低嘅绝,大部份人系随时间慢慢放低,呢只歌又帮佢哋勾番出嚟。”

Kay心底有冇一个放唔低嘅人?佢话:“我其实好长情,喺我心目中,以前拍过拖嘅人会深深记得,我同Juno讲我都系咁嘅人,原来我哋都系双鱼座,唔怪得我哋气质好似,佢有种双鱼座温柔。”


一镜到尾手法 拍摄MV Juno轻抚Kay的面
麦浚龙同谢安琪合唱嘅神曲《罗生门》已经拍咗MV,呢张EP里面嘅系列MV,由Juno亲自执导,全部MV都用一镜到尾手法拍摄,特别系拍《罗生门》时非常复杂,由于Kay同Juno嘅走动特别多,灯光同摄影组为配合两人嘅走位,彩排时间比较长,拍咗十几个钟。

Juno喺MV里面深情款款咁望住Kay,并伸手轻抚佢块面,完全切合佢喺歌曲嘅痴情角色。继外传《瑕疵》同莫文蔚(Karen)合唱后,今次第三部曲《罗生门》就锁定Kay系女主角,Juno话:“要创作一个故事,唔可以只得一个角色,由十年前嘅《耿耿于怀》开始,听众从主人翁(男孩)去听去睇佢嘅爱情故事。十年后,大家听《念念不忘》了解佢成长后嘅感情状况。《瑕疵》系男孩长大后同现任伴侣嘅感情,所以谂起Karen,因为佢存在一份淡然,能演活歌曲嘅角色。而《罗生门》系有关十年前嘅前任伴侣故事,想揾一个同Karen感觉、味道完全相反嘅女歌手演呢个角色,第一时间就谂起Kay,一直认为佢嘅声线存在一种不舍。”

Kay就话收到Juno嘅邀请,感到十分意外:“往往就系意想不到嘅事,先会有惊喜有火花。我好欣赏Juno系一个有品味有自己思想、风格嘅人,呢样系我想同佢合作嘅第一个原因。第二个原因系佢揾我做《罗生门》女主角,呢个系十年前嘅角色,一个人可留喺另一个人心中十年好难得。最后一点系我唱片主题好少纯爱情故事,Juno呢个构思一直系我好想做嘅,我亦好钟意首歌嘅出发点!”




记得当初麦浚龙刚出道时和张敬轩合唱的《玩得》,让我们认识了他。到现在的和谢安琪合唱的《罗生门》,不知不觉已经十年了!


十年人事几番新,新老花旦别样红。


麦浚龙用了10年时间来跟我们讲述这个爱情故事,他跟黄伟文,只用了一首歌,一个晚上,便摧毁了许多人心中的一个梦。


最后,我将Wyman的原话跟大家说多一次:“十万个人问我点解咁残忍,一手摧毁佢哋十年嚟嘅梦,我话,欢迎嚟到现实世界,依家你闹我狠,但三五七年后,你醒咗会多谢我。”


没错,现实是残忍的,但梦醒过后,你们会感谢Wyman还有麦浚龙。



(转自香港娱乐频道HKChannel)


点击阅读全文精彩继续

发表评论
用户反馈
客户端